Taboan 2013

Nen Santiago Villafania

ALENLENEG tan bokor ko’y Pangasinan ed taloran diligado ya impawit na Philippine PEN ed saya’y 2013 Taboan: The 5^th Philippine Writers Festival ed Dumaguete City nen 7-9 na Pebriro. Kaibak ira’y diligado tan sumusulat a nanlapu ed amianan. Karaklan et Ilocano.

Imparungtal ko’y papil ko ed duaran panel: Experimenting with Genres kaiba ira di F. Jose Ronnie Cao, Shirley Lua, Paolo Manalo, tan Joanna Cruz (moderator); tan Writing for the Ebook Market kaiba ira di Isagani Cruz (moderator), Gil Montinola, Reuel Molina Aguila, tan Jose ‘Butch’ Dalisay (keynote).

Say masimoon kon pangikinon tan pangitandoro ed saray Taboan 2013 Literary Awardees: Cesar Ruiz Aquino, Paolo Maria Diosdado Casurao y Granados, Erma M. Cuizon, Lamberto G. Ceballos, Marjorie Evasco, Maria Luisa S. Defante-Gibraltar, Alice Tan-Gonzales, Ernesto D. Lariosa, Ma. Rosario S. Cruz Lucero, tan Victorio N. Sugbo.

Laut la ed saray Taboan Lifetime Achievement Awardees: Cirilo F. Bautista, Leoncio P. Deriada, Bienvenido Lumbera, Resil B. Mojares, Elmer A. Ordoñez, tan Isagani Cruz.

* * * *

Nibana met ya kabansag na Taboan so New Delhi World Book Fair ya agawa nen 4-10 Pebriro 2013 ed Pragati Maidan, New Delhi. Imparlas nen a-5 na Pebriro so libro na anlong ko ed Inglis ya impatalus nen Vijaya Kandpal ed salitan Hindi a walaa’y titulon ‘Premanjali’ tan inggalut na managpalapag a Bodhi Prakashan.

* * * *

Anemiran umaanlong a Filipino – Albert Casuga, Felix Fojas, Danny Castillones Sillada, Joanna Allas, Santiago Villafania, tan Jaypee Belarmino — so mangiyalagey na bansa dia ed World Poetry Peace Festival no Abril 4-30, 2013 ed Ike’s Art Gallery, University of British Columbia, Vancouver, Canada.

Nominado si Albert Casuga ed Mississauga Arts Council Literary Awards nen 2007 tan analo la’y gamor (awards) para ed saray kuritan to ed Canada, U.S.A., tan dia ed Filipinas. Sakey ed saray ikikinon ya umaanlong si Felix Fojas, matuan uliran ed kontimporarion literatura ed lapag a bansa. Si Danny Castillones Sillada kabat a surrealist a pinto, skultor, installation tan performance artist, philosopher, multilingual ya umaanlong, sumasalaysay, musikiro, litratista, tan indie filmmaker. Fashion designer si Joanna Allas tan co-host na literary website ‘Pinoy Poets’ Circle’ a walaa’y masulok ya apat a lasus ya aktibon miembro ed intiron mundo. 2010 Asna awardee si Santiago Villafania para ed Arts & Culture (Literature); akansulat na Malagilion, finalist ed 2007 National Book Award for Best Book of Poetry; analo na Gawad Komisyon (Gantimpalang Tamayo sa Tulang Pangasinan) nen 2007. Si Jaypee Belarmino so 2012 World Poetry International Empowered Poet tan Artist of the Year; sumusulat, sumasalaysay, litratista, graphic tan abstract artist.

Magnayon lawas so kuritan ono litiraturan Pangasinan angga ed biek-taew.

Aristos!

Back to Homepage

Share your Comments or Reactions

comments

Powered by Facebook Comments