Panalagar: Duaran Anlong

Nen Santiago Villafania

 

Panalagar

 

pinabli iner so kawalaan

nen saray matak et malangwer ni

tan say puso et agni abogbog

na malurey iran panangaro?

 

wala’d kaumaan na anganko

tangay-tangay ed saray bitewen

kekerewe’y isabi na sakey

a pinalsan insipan na kugip

 

no dia’d kanonotan mo et wala

so nayarin pawilen ya agew

pawil ka inaro tan anap mo

agla kapigan narumog mo ak

 

ed saray agew a panalagar

agmo ak labat la naimano

 

 

Panalagar

 

nen Melchor Espeleta Orpilla

 

Mantiktik so rilon mangibaga’y igsa

Singa pa ikongkong to’d siak so bayag ko

Lan ameneng ed arap na laptop kon ya

Ya manalagar ed isabim dayong ko…

 

Mandaldalagorug so karul ed sagur

Ya ag napepeta’y insolung ko’n headset

Ta manpuspusapos so pusok kalamur

Ya lukasan ko’y email kon taruk to’y wisit…

 

Akin tan masagapsap kan pabulon ah

Singa tsa’n abuyak ed nansupotan to

Mabayag kan bikleren, et kaapigan ta’n

ontonda’y tayaketek ayan masungdo?

 

No ontakilingak la balet ed liwang

Natalusan ta ka igsan manmantini

Ta no onsabi ka siopa’y mogmon lamang

So mamaat ed liket ko ‘ra tan singi?

 

Balap, ikosmeng kon manalagar lanti

Daiset labat la, wadtan ka lan pirmi…

 

Salaya tan aristos!

Back to Homepage

Share your Comments or Reactions

comments

Powered by Facebook Comments