Aristos
Uni ed Caboloan
Nen Santiago Villafania
sinamaew la’ran amin
ira’y matatakken ya umaanlong
sikaran akanemben na kopian kanepegan
da’ra’y tongtong tan anlong
ya binmabalitok ed kanonotan
tan ilalam da’ra’y sinaunan atateng
sansansakey tan kalkalna ‘ran inmikban
a singa aponsil ya bolobolong
tan lirion inagos na panaon
ed awaran na pakalingwan
no anto so inekal ed kanonotan
et nabalang tan naandi
uliran man ono bilay-awaran
tan kumbilay da’ra’y kamareruan inkorit
ed saray egpang a mansasalming
ed uniberson inakmon la’y ibolusión
ed saray kinalakian nen Urduja
ed saray boleg-Aryan na Ibalong
ed saray dinidyus tan makauley a sinulmingan
na masisibeg iran bayani tan ikikinon
ya dinmadabuk la’ra ed ilalam
tan maatap ya asagmakan
Salaya tan aristos!
Share your Comments or Reactions
Powered by Facebook Comments
