Kansion a Pangasinan

Nen Santiago Villafania

 

LIKUD ed ngalngali ono dawitdawit lan inkabalang na litiratura ed luyag, say sakey natan a nepeg a pantoonan na imano et say ibulaslas na kansion a Pangasinan. Asagmak tayo ed Malinak la’y Labi, Rosing, Abeten, tan saray kansion nen kaluyagan tin “Insiong” Tamayo bangbalet anggapo ni so natawag ya ibolusion na kansion iran Pangasinan.

Kanian baleg so suportak nen imparungtal na Pangasinan Tourism kapigan labat so paliagan na “Song + Music Video” anggaman dia ed salitan Filipino odino English iya. Say pakatalus ko, say napilin kansion et usaren ed turismo bilang pangitandoro ed saray totoo, lugar, produkto na luyag.

Dali sirin, dengelen no wala’y ibubuga tan pilatek da’ra’y kompositor tayo!

*          *          *          *

Balet ag komun mansumpal labat ed paliagan lapu’d ta nakaukulan tayon pasimbaloen so kansion a Pangasinan. Labay ko’y makarngel na Pangasinan pop songs, rock, tan ballads ed saray radio odino makanengneng na MTV dia ed YouTube.

Singa no bilang dia ed Bicol, naimatonan ko no panon dan in-revive ima’y kansion dan Sarung Banggi ed tempo na slow rock tan reggae. Marakerakep so nanmaliwan tonia.

Dia ed Pangasinan, nayari tayon gawaen a rock odino reggae ima’y kansion tayon Limon kan Kakanen bilang pangigapo labat angga’d nalagyat la’ra’y managsulat na kansion a manggawa’y kontimporanio tan balo iran komposision.

Salaya tan aristos!

Back to Homepage

Share your Comments or Reactions

comments

Powered by Facebook Comments