Aristos
Pangasinan: Luyag, Salita, tan Totoo
Nen Santiago Villafania
“It is important to reflect on the importance of language and understand why it matters more as a form of identity than a medium of communication. Language is a cultural asset. It is the duty of government to come up with legislative policies that protect and preserve indigenous languages.”
Say Pangasinan uusaren ed ngaran na luyag, salita, tan totoo. Aya so mabetbet kon ipapaneknek tan ibabangat natan bilang sakey ya umaanlong tan sumusulat nanlapu nen impalapag to iya nen Pangasinan Hitorical & Cultural Commission (PHCC) Commissioner Virginia Jasmin Pasalo. Say ‘Pangasinense’ et kinastila (Hispanized) ono ininglis (Anglicized) a kuan tan aya so sipur ya uusaren ko no mansusulat ak ed dilin salita.
Likud ed pakaamta na karaklan, say salitan Pangasinan natan daiset la’y matonung a mansasalita no say maptek a panag-Pangasinan so pantutungtongan. Karaklan ed saray wala’d kalangweran natan Tagalog/Filipino odino English so pilatek tan kalareker na dila ra. Makapasinagem ta say anta da’ra’y arum a boleg et ibabaing tayo so dilin salita.
Maung labat ta wala iya so Mother Tongue-Based Multilingual Education (MTB-MLE) a say getma to “first-language-first” no iner nepeg ya usaren so salitan abangonan ed panagbangat dia ed saray awiran ono iskuilaan. Wala’y labinduan mayor a lingguahi ono lingua franca ya usaren: Tagalog, Kapampangan, Pangasinan, Iloko, Bikol, Cebuano, Hiligaynon, Waray, Tausug, Maguindanaoan, Maranao, tan Chabacano.
Bangta akabatan kon wala’ra’y tiksbuk ono libro konon uusaren da ya inaon tan impatalus nanlapu ed salitan Kapampangan. Ay! DepEd Pangasinan, parlasan tan imano yo pa met kari! Usar yo met komun ira’y kuritan a peteg a nisulat ed Pangasinan!
* * * *
Kapigan labat opisial a lingguahi ono salita la so Iloko ed probinsia na La Union. Say La Union so sankaunaan ya probinsia ed lapag a bansa so angiparungtal na ordinansa pian niyagel tan napakasil so dan salita.
Maung ni’ra’y mangouley ed La Union ta amta ra so kipapasen na salitan Iloko. Amta ran onkakapuy met la iya no iyampag ed saray kailalakan a makasalita na Filipino tan English ed luyag da.
Aliwan maoges anganko no dia’d luyag tayo et isugiri tayon nakaukulan a wala met so naidatek dan ligislatura pian birbiren so salitan Pangasinan bilang ‘official’ ono ‘heritage language’. Nayari, anto Dr. Gonzalo Duque?
* * * *
Akabatan ko ed si kagalang a Dr. Marot Nelmeda-Flores ya ama’y listaan na sumusulat tan umaanlong para ed CCP Encyclopedia saray wala’y libron naipalapag labat so pilien da. Saraya et sikara di Leonarda C. Carrera, Matuan panangaro; Linda Andaya, Gamal tan arum ni’ran Antikey ya Istoria; Erwin Fernadez, Si Liwawa, say pusan agto gabay so ondangol; tan Santiago Villafania, Pinabli & Other Poems.
Kanepegan angankon naikanon met la’ra’y arum nin sumusulat tayo ta masurin baleg so balur na inbiang dan panangaro ed namamagaan tin kuritan o litiratura insulat man iya ed Pangasinan, Iloko, Bolinao, Filipino, tan Inglis. Say malayug kon pangilugay ed sikayon amin a sumusulat tan umaanlong na Pangasinan!
Salaya tan aristos!
Share your Comments or Reactions
Powered by Facebook Comments
