Panpipilalekan

Nen Santiago Villafania

 

AKAPASYAR ak ed Post Office dia ed Lawton nen Martis, a-21 na Mayo tan say pegdat ko komun diman et mangaliw na stamps nipaakar ed Pangasinan. Amtak a wala’ra’y sipur lan imprinta da nen saman: Hundred Islands, lighthouse na Bolinao, simbaan na Mangaldan, tan dakel ni’ra likod ed saray ikikinon tin kaluyagan ono nanlapu so poli ra ed Pangasinan.

Panagasi’y Katawan, anggapo’y asaliw o nalmok ya anggan sakey!

Wala balet so akatongtong kon akapangibaga ya say curator na postal museum et taga-Mangaldan. Inibaan to ak ed abitlan opisina tan impakabat to ak ed si madam Nena de Guzman, say Acting Chief na Postal Museum & Library.

Naimanok so kipapapen na postal museum. Wala iya ed komatlon palapag ed lugar a singa no archive. Wadman iran akaparungtal so nanduruman stamps collection tan aliling da’y libron ag nabubukay ya no tongtongen so tua et wala’y maawaran a balur da.

No onia so post office tayo ed Manila, panon to kasi ed arum a lugar? Dia ed luyag tayo no bilang? Silalalon makapanangnangis ta dinmaiset la so mangipapawit na sulat ed korio ta wala la lanti so celfon, email, tan facebook tan arum nin social media ya makanakana ed sayan panaon.

*          *          *          *

Atepet nen madam Nena no wala’ra’y museums ed Pangasinan. Inkuan ko ya wala met ira bangta anggapo ni so provincial museum. Anggan ko no naapiger so Casa Real marakep iyan gawaen a museum. Say pilalek ko met ya Pangasinan Studies Center tan say Pangasinan Historical and Cultural Commission ya no nayari et wala met komun so dili ton opisina.

Anto so kuan yo ed saya ey, Gov. Amado T. Espino?

Manaya, congratulations ed impanalo yo lamet. Magter so suporta na Pangasinan ed sikayo tan saray kakaiba yon analo. Masimoon yo pa sirin a tooren so inikbanan yo ‘ran promisa pian magenap a nagamor so piaet tayo ed pinabli tin luyag.

Salaya tan aristos!

Back to Homepage

Share your Comments or Reactions

comments

Powered by Facebook Comments