Taloran anlong ed ambelat-agew

Nen Santiago Villafania

 

No anto’y ag dinondon nen Kristo

ay sankablian so agew aya

no kapigan impatua’y amalsa

so panondon to ed kasalanan

tawir ni’d onan boleg nen Adan

insanla’y bilay lapu ed aro –

anggapo’y miparan panangaro

inurasan na mabli ton dala

so dutak ya amalkot ed talba

 

bangta wala’y atilak ya sugat:

apatiran sugat ya binmakat

tan binmutaw ed salik tan limak

tinmalus angga ed kamareruak

 

ta nen impasak ed agew aman

agto dinondo’y dabuk kon laman

 

duaran sonito

1.

tinmerter so dala na salita

ya anoor na daan ya sipan

tan anondon ed say kasalanan

tawir nin nanlapu ed si Adan

 

salita ed gapo’y uniberso

tan berso ya nagmaliw ya too

linawa na impinito ya dyus

ya ipasak tan ompatey ed krus

 

dia’d angipasakan ya pugaro

binmuneknek ira’y bato-bato

ed amagan dalin na kalbario

nen asalug na mablin dala to

 

alaldis so tawen tan ayegyeg

so mundo  kauyos na engas to

 

2.

siak so sankaunaan ya anghil

a nanlapuan na matan agew

liwawa’y bulan tan labitewen

ya insibuag ed sansinakuban

 

siak so matuan anghil a duksaan

siak so oleg a siping so dila

siak iman so angiter na bongan

kinusab nen Eba tan si Adan

 

siak iman so inggatin na ina

ya Gumamela Celis na talba

siak so diablon impeleg ed kelas

nen insegep ko’y gelew ed tawen

atoor so linawa’y Dyus Ama

nen pinatey na too so Kristo

Salaya tan aristos!

Back to Homepage

Share your Comments or Reactions

comments

Powered by Facebook Comments