Aristos
Taon na Oleg ed Danum
Nen Santiago Villafania
Linmabas so maawaran ya impandarasig na planita ya angikaput na limanlibon taon ya impangiparlas da’ra’y totoon Mayan nipaakar ed pansamput komun na bilay ed sansinakuban nen Disiembri 21,2012. Bangta atoor labat iya ed dili ran sibilisasion.
Pinetekan da’y dili ran tawen tan inaral da’y galaw na bitewen ed lawak na kosmos. Tinokor da’y kaaralem na ilalam da tan agamoran da’y togatog na inkapalsa ra sakbay na insulming na arum ni’ran boleg.
Makapaermen maim-impis so atilak dan kuritan ono litiratura tan awaran ya inggurgurlis da ed bato.
* * * *
Amatanir so taon 2012 aman ya anggapo labat la’y alalbong a balita nipaakar ed kuritan a Pangasinan likod ed alenleneg a nipalapag a libro tan say impangiletneg na Kurit Panlunggaring, Kurit Awaran, tan say impamirbir ed saray matalunggaring tan maasnan kaluyagan.
Ananigan tan ampasiseng so kolor na oleg ed danum ya onkurong ed luyag ed saya’y 2013. Mansiansia man ono onduma so siplog na dagem na pulitika ed luyag, mansiansia so ibulaslas na kuritan tan kultura.
“Campaign in poetry. Govern in prose.” aya so ibebelyaw kon diparan ed saray amin a pulitiko ed saya’y arapen a basingkawel.
Manaya, ikinon ko so gobernador ya makapangialagey na obelisk ditan ed arap ono diking na kapitolio.
* * * *
Pilalek ko ed sayan taon so iyabong lamet na kansion a Pangasinan, ibangat so awaran tan kuritan ed saray awiran tan unibersidad ed luyag, naigalut ira’y klasikon sulsulat nen Pablo Mejia, Maria Magsano, Jan Villamil, tan arum ni’ra; tan naipalapag so kanon na litiraturan Pangasinan.
Wala met ed kanonotan so balon pilikula, sintro na awiran a Pangasinan (studies center), sakey a kombilay ono diglat, libro na anlong, poetry installation, anlongan (poetry readings), tulagan ono literary conferences, ortograpiya/gramatika, e-books…
Ay agi! karakel ya nakaukulan ya gawaen ed atiktikey a panaon!
* * * *
Itdan ko na lugar ono ispasio ed sayan kolum so mangipawit na antikey ya anlong. Email yo pa labat ed illuminati.literatus@yayhoo.com
Maasnan taon ed sikatayon amin.
Aristos!
Share your Comments or Reactions
Powered by Facebook Comments
