Anto sirin, ey!
Gen. Yamashita’s Treasure: Tua ya kasi?
By Mel V. Jovellanos
ANTOYA kasi’n ibabagara’n “Yamashita Treasure?” Tua odino diglat (fiction)?
Nen timerak so World War 2 ed Asia, abigla’y U.S.A.. Pigpigaray agew ni labat kasompal na impanbombay Hapones ed Pearl Harbor, nan-landing ya tampol so libu-libon sundalo’y Hapones ed Lingayen tan Damortis. Singa kirmat so impanalo’y Hapon ya inpangolo nen Heneral Tomoyuki Yamashita. Diad agangano’n bekta, simuko so Pilipinas, Netherlands East Indies (Indonesia), Singapore, Federated Malay States (Borneo, Sarawak, Malaya), Thailand, Burma tan IndoChina (Laos, Cambodia, Vietnam). Saray kayamanan ya atipun kuno nen Yamashita ed amin ya naciones ya timuwek ed Japan, et mas dakel nen samay kayamanan nen Ari’n Solomon.
Mansampot ed taon 1944. Pinmawil si Heneral Douglas McArthur ed Pilipinas. Saray Hapones natan so unaatras. Unong ed nambabangil ya awaran, si Yamashita inlugan to ed duaran “battleships” so nibabagan kayamanan. Awiten to kumon ed Tokyo balet ta agatuloy. Agla nayari kuno’n makabaroy so barko’y Hapon ta amin lan dayat kontrolado lay “Allied submarines.” Mapeles so desisyon nen Yamashita: Nen kasabi da ramay “treasure ships” ed Lingayen, inyepas tan inkarga’d pigaran 6 x 6 trucks so amin ya makapagilabot ya kayamanan. Diman mismo ed Lingayen pigaralah kuno so inkutkot dan treasure lalo lad lugar ya asingger tan kaliber-liber na Sison Auditorium tan Kapitolyo. Kanian agaylay karakel lay kinutkot dara’y manag-treasure ed saratan ya lugar, anggad natan. Walalay akalmo kasi na goldbars? Tan gold coins, diamonds, perlas, tan arum nira? No bilang walay akala, atan ya kakabatan, sekreto labat, anto sirin, ey!
Lapud say direkto’n gangan nen Yamasita ed saray totoo to, wala kuno’y masulok ya 500 ya nambabangil ya lugar ya angi-kutkotan odino angiamutan da’y kayamanan. Say dakel kuno, unong ed saray mapa na Hapon tan mismo’n imbaga daramay World War 2 “survivors” ya totoo nen Yamashita, ed dia’d Damortis kuno tan pigaran bahley ed luyag na Pangasinan: Sison, Pozorrubio, San Jacinto, San Fabian, Manaoag, Dagupan, Mangaldan tan wala ni’y pigara. Walay mangibabaga ya dia’d Pozorrubio so sanka-rakelan na angikutkotan na gold bars, diamonds tan alalahas.
Saray “treasure maps” ya unlelesa tungal paminsan (peke odino andi) itutoro da no iner so kawalaan daratan ya kayamanan. Natandaan yo ni ‘may “Golden Buddha” nen Presidente Ferdinand E. Marcos tan karakel ya gold bars ya akuntaleng da ed Kennon Road? Walay panaon dia’d Burnham Park ed Baguio napnoy “diggings” na “treasure hunters”. Dia’d loob mismo na Fort Santiago ed Manila nansawa ray “treasure maniacs”. Pati si President Cory Aquino impulakit da’y ngaran to ed itan ya panaganapan na treasure nen Yamashita.
Agla nabilang so mamayaman ya treasure hunters ya naupot so kuarta ra nisenggeg ed panag-finance na “treasure hunting ventures.” Pigaralan gilig na Rizal Monuments ed luyag ya akutkot daraya’n manag-anap na kayamanan nen Yamashita.
Si General Fabian Ver kuno so sankarakelan ya akalmo’y treasure. Aya balet, gangan labat ya nanlapud si Presidente Marcos. Kanian say kuanda aramay milyon-milyon ya kuarta nen “McCoy”, gold iman nen Yamashita, aliwan tinakew kuno nisengeg ed “graft and corruption”
Balet ta anggad natan wala ni ray mantetepet no tua kasi ‘may tongtong ya akalmo kuno si dati’n Gobernador na Pangasinan, si Kagalang ya Dr. Francisco Duque, Sr, na Yamashita Treasure diman ed bobida na orig ya Polyclinic to dia’d Calle Torres-Bugallon (natanlah A.B. Fernandez Ave.) Makalat ya balita ya nen saman ni. Anto kasiy sey nen Attorney Gonz ed sayan balitan idadalamerem labat. Anto sirin, ey!
Share your Comments or Reactions
Powered by Facebook Comments
