Kurit Awiran

Nen Santiago Villafania

SAKEY ak ed saray naimbitaan a panelists ed agawan Kurit Awiran (1^st Pangasinan Creative Writing Workshop) nen Hulio 28, 2012 dia ed Capitol Resort Hotel, Lingayen. Say masimon kon pisasalamat ed maseseg a Tourism Chief Officer Malu Elduayan tan say taganon inoprisi da manlapu ed opisina na gubernador. Ontan met ed saray co-panelists kon sikara di Sergio Bumadilla tan Atty. Ferdie Quintos ya amalikuer na anlong/tongtong, tan angantabay ed saray duamplo tan sakey ya umaanlong/sumusulat.

Saray fellows ed sayan sankaunaan ya kurit awiran et sikara di Alex Fernandez, Harvie Aquino, Luisa Magsanoc, Jonald Fabia, Crissa Zamoranos, Jayson Bustamante, Maria Loudel Big, Kim John Santillan, Denson Padlan, Faye Angelli Caldona, Alena Albitos, Kristine Dawn Dudang, Elnora Dudang, Marino Repalda, Gerald Apostol, Jesusa Sanchez, Renand Nepascua, Alma Nepascua, Reiman Cayabyab, Jesamyne Diokno tan si Renato Santillan.

Magnayon kayo batch Kapituyaw!

Makapaermen ya angga’d natan et anggapo ni so creative writing workshops ed saray unibersidad tayo ed Pangasinan. Agayla’y pirpirawat kon wala so nailetneg anggan sakey labat balang la ed University of Pangasinan, Lyceum Northwestern University, University of Luzon, odino dia ed Pangasinan State University.

Nia ira ay so pigaran nayarin salian na sakey a sumusulat tan umaanlong pian naubol tan maparakep so panagsulat to: UP National Writers Workshop, Dumaguete National Writers Workshop, Cornelio Faigao Memorial Writers Workshop, Ateneo, UST, UP-Tacloban (Waray), Davao, IYAS, Lamiraw, Pasnaan (Ilocano), Juliana Arejola-Fajardo Workshop sa Pagsurat-Bikol, Cordillera Creative Writing Workshop, tan say Palihang Rogelio Sicat (PRS). Mangiiter met na workshop so Bienvenido N. Santos Creative Writing Center na DLSU tan say Linangan sa Imahen, Retorika, at Anyo (LIRA).

Siopa o dinan kasi ed saray unibersidad tayo ed Pangasinan so mangampon ed saya’y Kurit Awiran?

*      *      *      *

Buwan ng Wika la lamet tan say tima to natan ‘Tatag ng Wikang Filipino, Lakas ng Pagka-Pilipino’. Akin et aliwan Buwan ng mga Wika?! Ag kapiganman natibokel so totoopen da ya salitan Filipino no anggapo ira’y arum a salitan manpabuna ed saya, tan ag onkasil so inka-Pilipino no saksakey so payabongen a salita.

Aristos!

Back to Homepage

Share your Comments or Reactions

comments

Powered by Facebook Comments