Pangasinanitude

Nen Santiago Villafania

PANGASINANITUDE – aya so impaltaw kon salita ed Inglis bilang sakey a pamagalang ono pandaragup ed kultura tan inkatoo na Pangasinan a nayarin tayon ipatalus ya “celebration of Pangasinan culture and character”.

Masalindak ya atoor so Pangasinan Cultural Night tan intaguri met ya “Itandoro so Pangasinan: Glimpses of Pangasinan Life and Culture” ya agawa nen Hunio 19, alasais na labi dia’d ChickaRue Resto ed Conception Aguila Street, San Miguel, Manila.

Sayan impandaragup et impangiter na galang ed say ikikinon tayon Pangasinan folklorist ya si Perla Samson-Nelmida aman, inyanak ed abitlan agew; tan imbansag met la so kulminasion na Sesquicentennial nen Rizal.

Labi iman na kansion, sayaw, tan anlong. Naimatunan tan narngel ko’y inka-virtouso tonia’y Andrew Bryan Sapigao, sakey a manaltalon pianista tan apo nen madam Perla. Pinmaway met ya anganlong so ritaradan propisora tan umaanlong ya si Rosa Maria Magno, say akansulat na Urduja Beleaguered (1992) tan talora nin libro na anlong ed Inglis. Imparungatal da met ed siak so libro da na anlong a wala’y titulon Dia’d Akuala’y Akulaw (2010).

Akasabi met si Dr. Florangel Rosario Braid, kolumnista ed Manila Bulletin, kaiba ra so agi ran bii ya agayla’y tatas da met ya manbasa tan mansalita na Pangasinan.

Maliket ak no onia ‘ran totoo tan kaluyagan so napituyawan tan karongok ed sakey a pandaragup tan say pakdaar et nipaakar ed awaran, kultura, tan kuritan. Pilalek kon onsabi so panaon ya wala ni’ra’y unarum  ed saya’y melmelag tan  ngalngali la nabalang a boleg na sumusulat tan umaanlong – saray balon anacbanua ya kuan 😉

On, labi iman na kansion, sayaw, anlong tan pangitandoro na kultura tan inkatoo tin Pangasinan, agagik! Bangta kawalaan da’ra’y kalangweran laut la’d saray umaanlong?

*     *      *      *

sonito 155

(para ed si Dr. Perla Samson-Nelmida)

limgas kan inmapireng ed arap

da’ra’y matan napno’y panpilalek

tan dia’d panamegley na uyayi

pinatekiab mo ‘ra’y ilalam mi

 

dia’d akualan na kakawayanan

tinawag mo ‘ra’y lalakin ulsa

sikaran simbawa’y panangaro

a nidatek ed saray uliran

tan tongtong nen panaon ya aman

 

O musia ka na labin maanlong

labitewen ya tinmalintao

tan akiwaywaya ya agano

dia’d inleksab mo ed intablado

tinumbok ko’y anlong so samiong mo

Back to Homepage

Share your Comments or Reactions

comments

Powered by Facebook Comments