Balon polina na kuritan a Pangasinan

Nen Santiago Villafania

MARAKEP so nagagawa natan ed luyag lapu’d ibubulaslas tan iyayabong lamet na kuritan odino litiraturan Pangasinan. Sengeg iya na pitamitam tan seseg da’ra’y totoon wala’y masimoon nin pililikna ed pinabli tin salita. Wadtan met la so suporta, tulong, tan tagano manlalapu’d saray manguuley laut la’d say akayorung natan ed Abung ya Urduja.

No nen taon a 2000 et anggapo’y narumog iran salaysay tan antokaman ya nipalapag ed salitan Pangasinan dia ed Goggle o Yahoo, nibagak ya natan ed dakel la’y nabasa ed saray websites, blogs, tan social networking sites. Likud ed website ya Dalityapi.com, say Pangasinan.org  anganko so angilukas na sankaunaan iran forums no iner say tongtongan et ed salitan Pangasinan. Maliket ak met ya sipur lan lukas so A Kabaleyan’s Thoughts na Sunday Punch no iner nipalapag ira’y anlong tan antikey iran salaysay nanlapu nen awalaan iya na online bersion.

Paliagan, Pablikasion, Pilikula, Palian

Dia’d kakulangan na palapagan para ed saray anlong, salaysay, tongtong, tan arum ni’ran gawa o kimey na balon sulming a sumusulat natan ed luyag, sakey a pamailalo so impangiletneg  na Pangasinan Literary Awards ya tatawagen natan ya Kurit Panlunggaring. Imparungatal tan inyawat so kanepegan ya gamor tan pamirbir ed saray sankaunaan ya analo ed sayan paliagan ed Agew na Pangasinan nen Abril 11, 2012 dia’d Lingayen.

Saray analo ed panagsulat na salaysay et si Maria Loudel Biag (Dagupan City), onaan; Jorge Aviles (Lingayen), kumadua; tan Danstan Lee Pernes (Pozorrubio), kumatlo. Para’d pannagsulat na anlong ed dibision da’ra’y kalangweran, saray analo et si Archimedes Reimann Cayabyab (San Carlos City), onaan; Maria Loudel Biag, kumadua; tan Jayson Bustamante (Binmaley), kumatlo. Dia’d panagsulat na anlong ed dibision da’ra’y matatatken, saray analo et si Crissa Zamoranos (Calasiao), onaan; Ana Lyn Soriano (Bolinao), kumadua; tan Glenn Dale Pernes, kumatlo. Tan saray analo para’d panagsulat na antikey a tongtong et si Alex Romeo Fernandez (Dagupan City), onaan; Alvin De Guzman (Calasiao), kumadwa; tan Harvie Aquino (Lingayen), kumatlo.

Kaibak iran nanlingkor ya okom ira di Al Mendoza, Sergio Bumadilla, tan si Atty. Ferdinand Quintos.

*      *      *      *

Dia’d inlabas na sakey a dikada ed saya’y kumaduan milinio, likud ed saray akauna la‘ran inggalut a liblibro (Tongtong 1 & 2 tan Matuan panangaro) nen Leonarda Carrera (Amor Cico) sakbay na 1990s, inggalut so libro na anlong nen Jaime P. Lucas a Sakbay ya Onselek so Banua (1983) ya impatalus nen Sergio Bumadilla ed salitan Pangasinan manlapu’d Iluko; Gamal tan arum ni’ran istorya (2004) nen Linda R. Andaya; Balikas na Caboloan (2005), Malagilion: Sonnets tan Villanelles (2007), Pinabli & Other Poems (2012) nen Santiago Villafania; Tales from the Land of Salt (2005) nen Emmanuel S. Sison; Cellpoems: About God, Love, & Life (2005) nen Ferdinand Quintos; Say Pasirayew ya Malapati (2010), Si Liwawa, say pusan agto gabay so ondangol (2011) nen Erwin Fernandez; tan say antolohiyan Tagano ed Kelang (2010) ya impalapag na Ulupan na Pansiansia’y Salitan Pangasinan.

*      *      *      *

Dia’d pilikulan Pangasinan, in-pioneer tan indaulo nen Christopher Gozum ed panamegley na produksion ton Sine Caboloan ginmapo ed antikey ya experimental film a Surreal Random MMS Texts para ed Ina, Agui tan Kaamong ya Makakailiw ed Sika : Gurgurlis ed Banua  (Surreal Random MMS Texts for a Mother, a Sister, and a Wife who longs for You: Landscape with Figures). Inusar so tiksto na 1942 anlong nen Carlos Bulosan ed sayan pilikula. Analo na Ishmael Bernal Award para Most Outstanding Young Filipino Filmmaker nen 2008 Cinemanila International Film Festival.

Say kumaduan pilikula ton Pangasinan et say full-length experimental feature ya Anacbanua (The Child of the Sun) analo na Digital Lokal Lino Brocka Grand Prize tan say Best Director Award nen 2009 Cinemanila International Film Festival.

Tan nen 2011 impaway to so balon pilikula to ya Lawas kan Pinabli – ipapanengneng to ed sayan pilikula so bilay na Filipino ed diaspora dia’d Middle East ed mata na sakey a migrant worker ya manaanap ed nababalang ya asawa ton bii.

Back to Homepage

 

Share your Comments or Reactions

comments

Powered by Facebook Comments