A Kabaleyan’s Thoughts…
By Santago B. Villafania
Balangon na Ngaran
amingaw kon naamper agano
so imbuas na liwawa’d letakan
‘langalang a linmimata’y banua
ta bigta ton nanengneng so lakseb
tan say amaligaygay mon pagew
anggano saray musia na dayat
odino danaya’y kaumaan
onibeg ed yumis na limgas mo
bangta nipanon ka ya sinmulming
dia’d kaereman na Caboloan –
parnasu na tumatagaumen
tan umaanlong iran dapul la’y
kailalaman tan kanonotan
anggapo la’y asin na dila ran
manganlong ed tawir a salita
itepel mo pa so manangaron
onkekerew salo na pirdona
ed impanakew to ya bengat la’d
maginlep tan inggetar mon tawen
no inpangarom bilang pinabli
ag manaasinduana’y linawan
yanlong ed sika’y bilay a dili
yalay inge’y balangon na ngaran
ya agislaan na onan lesa
odino daan ya kamarerua
ag paagere’y boblay ed lupam
ag patertere’y ermen ed matam
Ed sayan Luyag
ed sayan luyag
kasumpal na binalitokan ya panaon
say tuan anlong et say tanila
odino un-uni da’ra’y siwit
tan dangoan da’ra’y dulakak
signos na santiagew tan salinap
samiong na kapageyan tan daralusan
sangpara ed maalindaway a katakelan
na onaaliguas iran balbaley
say tuan anlong et saray antokaman
ya agla naiitdan na imano
bagel so siopaman a pablien to
so balikas ya say balur to et imos
odino galat
inkorit man iya ed mabekas
ono dia ed atagey a kalar
ed sayan luyag
anggapo’y pidumaan na umaanlong
ed saray manangalin namamagaa’y kamarerua
naeerasan na panangitandoro
ed kawalaan dan garing a Tori
o Parnasu
saray manangaro ed sayan kailalakan
naandian la’y pililikna
akapangaw so ilalam da ed laem
na katonongan no iner mayupik
tan akakahon so pakanengneng
ed kuritan
laut la no aya et imparungtal
ed dili ran dila
agda pilatek so anlong
a siloloor ya angga’d natan et anima
tan adytum na sakey a boleg o nasion
Santiago B. Villafania
Share your Comments or Reactions
Powered by Facebook Comments
