parad sika selya

by manonton dalan

no basaen koy nonot ed terter na oran

ed saray apalabas iran malugon aruan

wala ni kasi nagametan kon abitbitla

andi balid selyan diyad pagew bimmaleyla

selyan naynay kon inyan ed peligro

umpano makalingwan ka ed panangaro

sengeg na inakalener toyan kapalaran

ed agaylan alabas ya kairapan

nalingwanan ko kasin agbasaen

irayan apalabas iran aruan

saray malugon bektan inter tod siak

ya pinanmunatan koy kesaw tan irap

dimmalan iray agew iran alay samit

tan anggapoy atilak balet pansibeg

matuwan panangaro ayuyang toy pagew

anggad ponpon bangkay koy aripen

natan manermenak ed panil-iliw ko ed sika

say gagawen kon panligliwa ed sayan dusa

ed saray apalabas ya panaon ya nanononotan

say orakam salming na inawan agamuran

say orakam ya gulis na pinablin lapis

inaron inkurit ed puso tan pannangis

saksakey ya pablin pakanonnonotan kod sika

ya agnatakew anggad kauyos na bilay

say kamarerwak so maaron undadayo

dimad luyag tan dalan ya nagagatinan mo

dimad angalakan na beata tan hilom ya atapew

sayan pusok manaynay ya sikay ikekerew

amin kapigaak lan napnapnoy paney-ey

dimad silong na alabasan tan manggan atagey

amay akabitin ya bungan labay mon burburen

binurbur ko parad sika inararon lamlamyungen

say amina ganaganak laman koy mitutulinan

ed agaylan paga nen sikay walay liliknaen

say pagak nen saman betang toy atageya tawen

say paraiso met balet so walay sipi ton tulongan

kakarawen koy malenleneg mon orakam

diyad ekat ya angalakan mananayam

babasbasen koy maligan sabangan

tan bakabakat na salim ed baton tuntunan

umpapawil iran singa anap-anapen ko

aramay panaon ya maligan naanggapo

no amay manames kad playa masaksakbay

ta agmo labaya nasabi kay etab ed baybay

singa narerengel koy naynay mon bitla

“taluran agew ya agta nanperrengan ”

say ebat ko balet ya walay salitan liga

“say sakeya too dakel larayan taryaan”

akin kasit anggapoy atilak ya agni asukayan

ed nonot na saray maligan limmulubay

diyad kamumutektek ko say luwak mansaysay

tarok toy tagoong kon”ay! anggapoy kapalaran”

iner kasi silyan ligliway pagew

akinet say aruan mi aglimmawig

kapigan so tiempon saray linggis to

et aliwan kamarerwak, tawen tan bilay ko

akin kasi nen sikami lay mansiyan

nauyos la komon so bilay toyan pakaskasin laman

ta no iyurakak no panonak ya umpatey

selya, diyad pusok sikay manandun itagtagleey

arayan agnatepelan iran kaermenan

o! ligan akaarawi, ta sikay sengegan

sikatoy angiguyor ed siak ya mananlong

bilay na pakaskasi isulat kon kansiyon

selya saray tungtung ko nayarin naemel

maermen ya bitla lapur say diyosak ngelengel

ya anggan kapirit agko labay so namelmelag

napalaranak komon ya narengel na nonot mo tan layag

sikatoyay manunan ugta na walnak ya kulyapis

ya diyad pinabpablin bakat mo et imantilis

aksubien mo komon anggan anggapoy kilas

nanlapud pusok ya say sibeg to et singa perlas

no say kasagmakan ko et kababaingan

say tubok so nadayew ya kesawa pounan

no babasaen mo rayan tagtagleey

nonot moak komon ya manpaparayew

malikeliket iran nimpa na lawa na bai

sirenas say kansiyon day makakiki

sikayo natay pinabpabli

na agaylay irap na diyosak ya pakaskasi

takdang kad akapaliber ya tambak inaro

pakaskasin kansiyon diyad lira itono

no sayan mansasalitan bilay et naanggapo

matuwan panangaro pilalek ton manandu

sikay rosas toyan tagtagleey, selya

itatanduro na M. A. R masasanting iran letra

birhin ya ina tan anak siak so mansamba

F. B. say matuwan manangarod sika

Share your Comments or Reactions

comments

Powered by Facebook Comments