PEN conference tan arum ni’ra

Nen Santiago Villafania

NEN Disiembri 2010 kaiba tan sakey ak ed saray angiparungtal na papil a pankuritan para ed Philippine PEN International Conference ya agawa ed Cebu. Binasak ed saman a tulagan ono conference so salaysay kon “Pangasinan Anlong: Oral Tradition into the 21^st Century”. Anggapo’y arum a pakdaared sayan papil noagta say kipapasen na anlong a Pangasinan, saray pigaran ikikinon ya umaanlong tan sumusulat ed luyag, tan no panon ak ginmapon nansulat ed abangonan a salita.

Ed saya’y arapen a Disiembri 7-8, 2012 nagawa so tinaon a PEN Conference ed Cultural Center of the Philippines (CCP) tan say pakdaar “The Writer as Public Intellectual”.

Libri iyan tulagan kanian ipapasabik ed saray agagin umaanlong tan sumusulat ya komun et ondagop ira ta anggapo’y panduaruwak ya dakel so naaralan a makatulong na baleg ed ibulaslas na kuritan tayo likud ed say niarum iran kakabatan a makanakana ed sikitin sumusulat.

Anto ey batch Kapituyaw na 1^st Kurit Awiran, mannenengnengan tayo sirin no asabi la iyan agew!

* * * *

Akapantutuyaw kami nen Dr. Florangel Rosario Braid, Bert Robledo, Atty. Lynn Alberto, Norma Liongoren, tan Virginia Jasmin Pasalo nen a-4 na Oktobri dia ed Maimee’s Garden Cafe, San Juan. Anggaman arawi ed kawalaan ko tan niamut a pasen so Maimee’s, marakep iyan usaren para ed melag a pandaragop ono meetings.

Apantongtongan mi so pamaoli na cancionan, zarzuela, moro-moro, tan say sasaluysoyen dan libro ya Pangasinan’s History, Culture and Development.

Say masimoon kon pisasalamat, Madam Flor, ed impangimbita yo ed siak. Uliten tayo tan no nayari et gawaen lan rigular ya miting!

* * * *

Atepet da manaya ed siak no anto so labay ton ibaga iya’y aristos. Say aristos et nanlapu ed sinaunan salita na Griego ya Areté (excellence), tan no maminsan ipapatalus da bilang “virtue,” bangta say sankaasinggeran ya talus to et “say panmaliw a sankamaungan a nayarian mon gawaen” (being the best you can be) odino “aboten mo so sankatageyan a potinsial na too” (reaching your highest human potential).

Titulo met iya na libron The Aristos: A Self-Portrait in Ideas nen John Fowles. Nipaakar ed philosophical aphorisms ton unan inggalut nen 1964, aribisa nen 1968 tan 1970.

Salaya tan aristos!

Back to Homepage

Share your Comments or Reactions

comments

Powered by Facebook Comments