Princessa Urduja: Tua kasi’n nanoley ed Lingayen

By Mel V. Jovellanos

SARAY puerta na pinasimbalon “Urduja House” diman ed diking na Kapitolyo ed Lingayen et alukasan lah lamet. Tinawag yan Urduja Mansion ya inletneg nen taon 1957 insan ginawan panayaman daray gobernadores na luyag.

Sayan balon Urduja House et sakey lamet ya man oyot na turista ta lanti agay lay karakep na inkapasimbalo to. “Tourist attraction of the first degree” kuanen ulo na turisme ed luyag tayo, Madam Malou Elduayan.

Balet say abalbaleg ya tepet: siopatan so tatawagen dan managbakal ya Princessa? Tua kasin nanoley ed luyag na Pangasinan? Ya antakut na lalakin karawen sengeg ed say imbagaton miasawa labat ed lakin makatalod sikato ed labanan na kampilan odino talibong (barang)?

Tua kasi’n sayan nanarian to’n tatawagen dan Tawalisi et say kawalaan to diad Lingayen?

Say sakey nin tepet: kabat da ni kasi na Pa-Pangasinenses si Urduja? Nan survey kami ed pigaran eskuwelaan ed Dagupan, Urdaneta tan Pozorrubio. Makapakelaw ta saray ugogaw natan agdalah kabat si Urduja. Walay pigaran eskuwelaan ed kolehiyo ya say ebat da: “Urduja? Di man so nanayaman nen Gobernador Agbayani (ama tan anak), Francisco Duque tan si Oscar Orbos. Agda kabat balet no siopa man ya too. Walay sakey ya pitoy taon to’n ugaw, say kuanto, “say ngaran nen manang ko et Urduja.”

Sikato itan so sakey ya katuaan natan: Inpangaran day Princessa Urduja ed saray anak dan bibii unong ed marakep so tanol to tan nibiig. Nen estudiante ak ni walay girlfriend kon man-ngaray Urduja. Agaylay samit na imis to insan magangana ni. Nantrabahon stewardess kasompal mi’d kolehiyo. Pasado ed Japan Airlines. Diad sakey ed saray tekiab to, (JAL), “nan-crash” may eroplano ed Dayat na Hapon (Sea of Japan). Diad antekey ya tongtong, insempet da’d Pilipinas so bangkay nen Urduja. Pati samay Urduja’k abalang met lah. Natan, anto kasi’y manmaliw ed si Princessa Urduja ya masanting ya simbolo na Pangasinan? Anggapo lay arom ya balbalita no agsamay insulat labat nen Arabo’n si Ibn Batute na Tangiers nen taon 1372. Aliwa kasi’n kogkogip labat nen Batute si Princessa Urduja?

Therefore, is Princess Urduja fact or fiction? Sikato ya’y tepet natan na karakelan.

Tombok yo iyan kolom sirin ta diad onsublay ipaamntak ed sikayo no tuan Lingayen so tinubuan to iman ya ibabaga ran Kingdom of Tawalisi ya nanarian kuno nen Princessa Urduja.

Anto sirin, ey!!!

Back to Homepage

 

Share your Comments or Reactions

comments

Powered by Facebook Comments