Aristos

57th Philippine PEN Conference

S. Villafania

Nen Santiago Villafania

 

KASUMSUMPAL labat na 57th Philippine PEN Conference ed saya’y imbeneg a Disiembri 2-3, 2014. Tan apalaran lamet iyan magter a lingkor yo bilang sakey ed saray apilin 2015-18 Board of Directors na Philippine PEN– ulupan da’ray umaanlong, sumasalaysay, tan nobilista. Kabaiba iran apili di Herminio Beltran, Jr., Ricardo Soler, Karina Bolasco, Amadis Ma. Guerrero, Charlson Ong, Bien Lumbera, Glen Mas, Lito Zulueta, Kristian Cordero, Jun Cruz Reyes, Dada Felix, Doming Landicho, Frank Peñones, and Lito Casaje.

Say naimatunan ko balet ya makapaimon et saray libron inggalut na Ateneo de Naga Univesity. Karaklan ed sarayan libro et insulat ed salitan Bicolano. Legan a nagagawa so book launching et momotekteken ko no panon to kasi ombulaslas met so kuritan a Pangasinan no anggapo labat la’y awiran ono universidad ed luyag so makanonot a mangiletneg na printing press tan unalagey ira bilang publishers para ed saray sumusulat tan umaanlong iran wala ni ed kalangweran.

Inkuan na karok a umaanlong, nantutulungan ira pian pakapangipalapag ira na libro tan lapu met la iya ed suporta na sakey ya unibersidad. Marakep no naalig tayo iya komun ed Pangasinan tan anggapo la so nailalaoan tayon publishers ed Manila. Turingan yo ak, agda igalut tan ipalapag so antokaman ya insulat ed salitan Pangasinan.

*          *          *          *

Marakep met no naalig tayo tan makapangiparungtal na tulagan ono conrefence nipaakar ed kuritan ono litiraturan Pangasinan a singa say gagawaen min tinaon ed Philippine PEN. Yarum ed sayan taon so impangipalapag mi na Philippine PEN anthology a wala’y titulon Healing. Sinaluysoy to iya na Hermie Beltran, Jr., tan sayan lingkor yo so angidisinio bilang sakey ya e-book balet ta igalut met iyan libro ed sayan bulan ono Iniro 2015.

Abalitaan ko met manayan wala’y duaran unibersidad so labat dan mangiletneg na Pangasinan Studies Center. Wala’y sakey ed Dagupan City tan sakey met Urdaneta City. Agko ni amta no maung a wala’d nanduruman pasen ira’y sintro na kuritan tan kultura. Say amtak et sakay labat ta mairap so wala’y duaran sintro ta omapano onsabi-sabi so panaon ed mansisibletan ira na koliksion da.

Sakey labat so nepeg a Sintro na Awiran a Pangasinan.

*          *          *          *

Apantongtongan nen imbeneg a miting na Pangasinan Historical & Cultural Commission (PHCC) ya i-launch la ima’y Pangasinan history book ed saya’y arapen a Disiembri 19, 2014 diman ed Urduja House.

Salaya tan aristos!

Back to Homepage

Related Posts

  • AristosMay 13, 2013AristosPalikuer ed paliagan Nen Santiago Villafania      IPAPANEKNEK kon lanang ed saray kaluyagan laut la’d saray wala ni’d kalangweran iran sumusulat ya say bilay na sakey a […]
  • AristosOctober 22, 2012AristosPEN conference tan arum ni’ra Nen Santiago Villafania NEN Disiembri 2010 kaiba tan sakey ak ed saray angiparungtal na papil a pankuritan para ed Philippine PEN International […]
  • AristosJanuary 20, 2014AristosMikanika na Tinapay Nen Santiago Villafania   NAIMBITAAN ak na sakey a kaaron Italianon umaanlong a si Michele Caccamo a mangipalapag na baylinggual a libro ed salitan […]
  • AristosAugust 19, 2013AristosKapolopoloan (Hundred Islands) Nen Santiago Villafania   MALIKET kon akabatan ya wala la’y onkikimey natan ed saya’y Hundred Islands (tatawagen dan Kapolopoloan ed daan […]
  • AristosSeptember 10, 2012AristosImpambaroy ed Luyag na Panay Nen Santiago Villafania  MABETBET no onkaili ak ed sakey e lugar ono pasen, saray sumusulat tan umaanlong so uunaen kon pakabatan. Tan dia’d […]