Sintro na Awiran na Pangasinan

Nen Santiago Villafania

TAON 2001 ni nen insugirik ed Jaime P. Lucas aman, pangolon-angiletneg na Ulupan, iyan pilalek tan pitamitam kon makapangiletneg na sintro na awiran na Pangasinan. Sayan awiran komun so mansirbin sakey a sinopan no iner tiponen ira’y libron Pangasinaniana ono kuritan iran insulat ed dilin salita tan nipaakar ed Pangasinan. Onalagey met iya bilang sakey a research center, liaison office, tan special library.

Liing yo ak pa, kaluyagan, ta angga’d natan et kugkugip ko ni labat iya! Ay andukerukey a kugkugip!
 

Asukaitan ko ed awaran na kuritan tayo ya wala’y atogiop ya Awiran na Pangasinan nen 1912 angga’d 1922 ed impangolo Pablo Mejia. Ed sayan awiran sinmulming ira’y ikikinon iran zarsuelista nen panaon aman. Makapaermen ya anggapo’y “literary traditions” ya impatawir da ed manumtumbok iran sumusulat.

Panon kasi natoor so sakey nin gunaet ya riklamasion na pankaluyagan a litiratura?

* * * *

Say tulagan ono Writers National Conference et unan agawa nen Disiembri, 1958 dia ed Pines Hotel, Baguio City. Sayan tulagan intindiaan na sumusulat nanlapu ed nanduruman pasen na Pilipinas tan imparungtal na Philippine Center for International P.E.N. ya inletneg ed saman met a taon nen F. Sionil Jose (natan National Artist for Literature).

Masoluk a sanlasus ya sumusulat so linman akibiang ed sayan tulagan no iner nipaakar ed supiatan tan tongtongan ed saray problima sa sumusulat tan say betang ono papil da ed pangipaalagey tan panibokel na nasion. Say sankaunaan ya Jose Rizal lecture et impabtang nen Sinador Claro M. Recto bilang sankaunaan ya managsalita.

Say PEN Conference wala la natan ed koma-55n taon tan kapigan labat agawa dia ed Cultural Center of the Philippines. Say koma-55n Jose Rizal Lecture managsalita et si Carmen Guerrero Nakpil.

Lamet, piaet kon natoor lawas ed saya’y arapen ya 2013 so pangawit ko na Philippine PEN Conference dia ed Pangasinan. 

* * * *

Akatongtong ko’y Dr. Marot Flores, say KWF komisioner natan para ed Pangasinan, nen imbeneg a bulan tan tinepet ko no anto la so asumpalan to ima’y ortograpiyan Pangasinan ya usaran komun para ed saya’y MLE ya kuan. Agda ni iya impalapag, bangta impromiso nen Ma’am Marot ya legan a manlilingkor ed KWF et asikasoen to iya.

Dia’d say tua, mainumay labat isulat so Pangasinan. Nepeg labat ya amta tayo so pandumaan tan usar na litran I tan E. No panon tayon isalita, ontan ti met isulat.

Salaya tan aristos!

Back to Homepage

Share your Comments or Reactions

comments

Powered by Facebook Comments