A Kabaleyan’s Thoughts…

 (This space will be reserved for literary contributions from readers.The  PUNCH encourages readers to write and email to us their thoughts about their impressions and ideas about life in and outside of Pangasinan, whether social or economic or cultural. No politics, please. Thank you. – Publisher).

Villanelle 5
By Santiago Villafania

no say ondengel et saya’y puso
naandi ‘ra’y paga tan sinagem
nagamora’y pilalek ya aro

anggapo’y tagleey o tambayo
ya mangiter na ermen tan sayem
no say ondengel et saya’y puso

naandi dedia na panangaro
napineng so mayemyem a ngarem
nagamora’y pilalek ya aro

say aro oala’y pakayari to
ya sugbaen dageyem na dagem
no say ondengel et saya’y puso

oala’y katooran na ilalo
ondalan man so nagnap ya odiem
nagamora’y pilalek ya aro

no maminsan say bilay na too
laineng ya napno’y dalamerem
bangta no ondengel la’ya’y puso
nagamora’y pilalek ya aro