Aristos

Dua’ran anlong

S. Villafania

Nen Santiago Villafania

 

Villanelle 19

agew lamet na bangus-Dagupan

say panangibelyaw ed awanta

tawag-imano’y ponsia ed dalan

 

say Gilon! Gilon! tan say kalutan

ganagana’y sokung et ligliwa

agew lamet na bangus-Dagupan

 

wala so lagiat ed kalapagan

dia’d kapitolio’y betel ed talba

tawag-imano’y ponsia ed dalan

 

saray mibabaley o dayo man

kasanlikna ran nalikna’y walna

agew lamet na bangus-Dagupan

 

akaparungtal ira’y panangan

tan arum ni’ran kakane’y mata

tawag-imano’y ponsia ed dalan

 

para ed balon kailalakan

kabiangan laya’y dilin kultura

agew lamet na bangus-Dagupan

tawag-imano’y ponsia ed dalan

 

Sonito 42

onong ed insulat ya istorya

na sakey a praylin manangali

dia’d nan-abetan na dua’ran ilog

tatawagen da nen sama’y Nalimpit

agawa so unaan ya bakal

da’ra’y Kastila tan Pangasinan

sengega’y inkaupot lawari

tan inkagalpong na anakbanua

na daan ya simpok ed Dagupan

nanlapu’d saman sinmibeg ira

so totoo ed abitlan pasen

kanian saray praylin sankaili

nibanda ira diman ed sagur

ya datin kolonia da’ra’y Tsino

 

Salaya tan aristos!

Back to Homepage

Share your Comments or Reactions

comments

Powered by Facebook Comments