Aristos

Duaran Anlong

S. Villafania

Nen Santiago Villafania

 

Sonito Alma

 

Anlongan taka singa no say musiak

Pitamitam bibil mon amulaklak

Bang komun ondapon singa kumpapey

Dia ed bibil kon nagtelan na miskey

 

Ay! awaten ko so pasnuk na tawen

Nalakap ka labat ed sayan bekta

Andi aliwa ak a talintaon

Dinmalan ed mareen a bilay mo

 

Ingen ta nankurus so palar tan dua

Istoria iyan inkurit ko’d anlong

Natan ta atoor la’ya pinabli

Nia’y panangaro ed laem na pusok

 

Kaimbuasan ombuskag ira’y rosas

Tekep tonia so natan tan arapen

Panalagar

Nen Melchor Orpilla

 

Mantiktik so rilon mangibaga’y igsa

Singa pa ikongkong to’d siak so bayag ko

Lan ameneng ed arap na laptop kon ya

Ya manalagar ed isabim dayong ko…

 

Mandaldalagorug so karul ed sagur

Ya ag napepeta’y insolung ko’n headset

Ta manpuspusapos so pusok kalamur

Ya lukasan ko’y email kon taruk to’y wisit…

 

Akin tan masagapsap kan pabulon ah

Singa tsa’n abuyak ed nansupotan to

Mabayag kan bikleren, et kaapigan ta’n

ontonda’y tayaketek ayan masungdo?…

 

No ontakilingak la balet ed liwang

Natalusan ta ka igsan manmantini

Ta no onsabi ka siopa’y mogmon lamang

So mamaat ed liket ko ‘ra tan singi?

 

Balap, ikosmeng kon manalagar lanti

Daiset labat la, wadtan ka lan pirmi…

 

Salaya tan aristos!

Back to Homepage

Share your Comments or Reactions

comments

Powered by Facebook Comments