Aristos
Padunungan, CYWA, Axlepin, Pentasi B
Nen Santiago Villafania
SAKEY ed saray abayag lan malogor a mangitatanggoyor na salitan Pangasinan et saya’y UP Subol Society (Diliman) ed panamegley na tinaon dan programan Padunungan. Ed sayan taon et impatanir da so panusar na anlong ko lamet para ed paliagan a balikas na anlong odino Poem Recital. Ompano manhurado ak met ed On-the-Spot Poem Writing Contest. Nagawa so Padunungan ed Dagupan City People’s Astrodome no a-24 na Oktobri 2013.
Para ed saray mangiyoolu na UP Subol Society natan, magnayon kayo lawas. Say masimoon kon pangilugay ed sikayo!
* * * *
Sakbay na Padunungan et naimbitaan met iyan lingkor yo ed nagawan seminar ya totogiopen na Cavite Young Writers Association (CYWA). Say pakdaar da et nipaakar ed “Pluma ng Agimat at Kawit: Ang Panitikang Kabitenyo sa Kontemporaryong Panahon.” Anganko say baleg a niapag ko et say ikspiriensiak odino saray adalan ko bilang sakey ya umaanlong a Pangasinan ya mibabaley natan ed Dasmariñas.
Karaklan ed saray anlong ko anggano say puso tan kamarerua tonia et Pangasinan, inkorit ko iraya ed Cavite.
* * * *
Iparungtal ko met so duaran ikikinon ya umaanlong a si Ashok K. Bhargava tan Gemino H. Abad no Gala Dinner Awards night bilang pangilukas ed international awards ceremony na Axlepin Publishing no iner igamor ed waloran umaanlong tan sumusulat so titulon Poet Laureates no a-13 na Nobiembri 2013 dia ed Rockwell Club, Makati City.
Kasumpal tonia, ondagop ak met ed Pentasi B Historical Forum & International Friendship Poetry Celebration 2013 ya itatanggoyor na National Library of the Philippines tan nagawa iya ed Marble Hall na National Museum of the Philippines no a-15 na Nobiembri.
Dia ed karakel na kapagaan nipaakar ed kuritan, anggapo la’y arum a panpipilalekan ko no agta say wala met komun so nagawa iran literary forums, seminars, lectures, congresses, tan conferences ed Pangasinan. Walan siansia!
Salaya tan aristos!
Share your Comments or Reactions
Powered by Facebook Comments
