PHCC; National Artist for Literature

Nen Santiago Villafania 

  

Naawat ko la so appointment ko nen imbeneg ya a-15 na Agosto 2013 bilang sakey ed saray intalagan komisioner na Pangasinan Historical and Cultural Commission (PHCC). Panaon met la pian panserbian ko’y pinablin luyag na Pangasinan.

Kabiangan na komision so PHCC Chair a si Dr. Gonzalo Duque tan saray miembro: Dr. Perla E. Legaspi, Ms. Virginia Jasmin Pasalo, Sis. Mary John Manansan, Ms. Arabella V. Arcinue, Ms. Nida P. Vergara, Mr. Restituto Basa, Fr. Weng Escano, Ms. Elvira Estravo, Vice Governor Ferdinand Z. Calimlim, Jr., and Board Member Ranjit Shahani. 

*          *          *          *

Wala’y angiyesaes ed siak ya duara so pampipilian da para ed National Artist for Literature: si Magdalena G. Jalandoni (1891- 1978), sakey a bantog a sumusulat ed salitan Hiligaynon a sulming ed mamasagur na Visayas; tan si Cirilo F. Bautista (1941-), sakey a premiadon umaanlong, nobilista, kritiko tan sumusulat na nonfiction.  

Abitla da aminsan ed siak nen Sir Cirilo a say ama ra et taga-Pangasinan. Sakey ira ed saray angantabay ed siak ya ituloy ko so pansulat ed salitan Pangasinan. Sikara so unaan ya angipalabag na review na librok a Malagilion: Sonnets tan Villanelles ed kolum da ed Philippine Panorama. 

Posthumous award no bilang si Jalandoni so napili. Bangbalet, lablabayen ko ni a si Doc Bautista so ontumbok a magmaliw a National Artist for Literature. Pirpirawat ko iya tan saray kaparak iran umaanlong tan sumusulat, likud ed saya, adga imburi ya Pangasinan so boleg nen ama ra. 

*          *          *          *

Lapu’d abitlak la’y nipaakar ed National Artist for Literature, sakey ed saray isugirik bilang komisioner na Pangasinan Historical and Cultural Commission so pangiparungtal ed si Maria Magsano pian makaloob a nominado para ed National Artist.

Pilalek tan pitamitam ko iya labat balet ta baleg so pananisiak ya wala’y balur na insusulat dan kombilay a nayarin pakabirbiran ed sikara ed kuritan na lapag a bansa.

Bangta, nakaukulan tan nepeg lan yalis ira’y kombilay tan antikey a tongtong da ed salitan Filipino odino English. Baleg met so betang tan kimey da’ra’y balon sumusulat tan unibersidad ed luyag.

Siopa kasi ed sarayan awiran: Lyceum Northwestern University, University of Pangasinan, University of Luzon, Pangasinan State University, Urdaneta City University, Virgen Milagrosa University Foundation, tan University of Luzon, so unaan ya mangioprisi na Pangasinan history odino literature? 

Salaya tan aristos!

Back to Homepage

Share your Comments or Reactions

comments

Powered by Facebook Comments