Palian tan Awaran na Pangasinan

Nen Santiago Villafania

APATIRA kamin taga-Pangasinan ed labin-anem ya apilin fellows ed 3rd Cordillera Creative Writing Workshop odino palian ya agawa ed Hotel Supreme dia’d Magsaysay Avenue, Baguio City nen Mayo 22 angga’d 26, 2012. Kaibak ira di Mark Anthony B. Austria (Bugallon), Jesamyne A. Diokno (San Carlos), tan Jonavey Grace C. Dupagan (Malasiqui). Tan inngaran mi so batch mi na Unas.
 

No nayari komun agko labay la so mila ni ed sakey a palian pian naipalugar ko la ed saray wala ni’d kalangweran, bangta kapilitan ta pilalek kon naaralan met no panon da yaantabay tan gagawaen so creative writing workshop a kuan basi ed panuntunan da’ray palian ed lapag a bansa a singa dia’d Silliman, UP, UST, tan Ateneo.

Nakaukulan tayo iya ed litiratura ono kuritan a Pangasinan pian silalon naubol ira’y umaanlong tan sumusulat tayo ed nanduruman istilo tan genre na panagsulat laut la ya wala so ginapuan lan paliagan a Kurit Panlunggaring no iner bibirbiren tan iitdan na gamor ira’y sankamaungan tan manaltalon anlong, salaysay tan tongtong ed salitan Pangasinan.

Nepeg labat a yatagey so balur tan kalidad na kuritan tayo pian agtayo naotit ed ibubulaslas na kuritan da’ra’y Ilocano, Cebuano, Bicolano, Hiligaynon, Waray, tan anggan say Tausug!

Natan sirin, isublay tayo met la so mangiletneg na dili tayon Pangasinan Creative Writing Workshop. Anto so kuan yo ed saya ey, Dr. Gonzalo Duque?

Agkayo mapaga ta dakel so naala tayon panelists no natogiop met la ima’y Pangasinan Writers Guild, awa, Sir Jun Velasco! 🙂

*      *      *      *

Aparlasan ko manaya ima’y unaan ya draft na isusulat dan Awaran na Pangasinan a walaan na titulon Pangasinan’s History, Culture, and Development ed imbitasion nen PHCC Comm. Virginia Jasmin Pasalo dia’d opisina na IVP-Phils. ed Q.C. Kudos ed say grupon manaanap tan mansusukait ed nanduruman dokuminto tan kasulatan nipaakar ed pinabli tin luyag. Isugirik labat komun ya no nayari et agyo gagawaen a singa no thesis odino dissertation iyan libro laut la ya akabatan kon dia yaon ira’y tiksbuk para ed elementary tan high school. Sakey ni, dakel so anggapo diman ed abitlan draft, dakel ni so alingwanan nipaakar ed pakdaar na awaran tan kultura.

Yesaes yo pa labat ta dakel so naiparungtal ko met ya nayarin makapangiter na sugiri da tan rikomindasion — wadtan ira di Dr. Ma. Crisanta Nelmida-Flores, Norma Liongeren, tan arum ni. Aya ay pakabitlaan met labat aglapigan nalimeng tan naimano.

*      *      *      *

Sakey so librok a Pinabli & Other Poems ed Beyond 100! say launching na 103 ya e-books tan 29 ya inggalut tan impalapag iran libro na De La Salle University Publishing House (DLSUPH) ed pangi-celebrate da’y DLSU centennial. Nagawa iya no Hunio 11, 2012 dia ed CSB Hotel International Conference Center, Arellano Ave., corner Estrada St., Ermita, Manila, no Hunio 11, 2012, alas-4 na ngarem.

Tan para ed saray kaluyagan tayon wala’d biek-taew, nasaliw yo met la dia’d Amazon.com so librok ya Malagilion: Sonnet tan Villanelles.

Aristos!

Back to Homepage

Share your Comments or Reactions

comments

Powered by Facebook Comments