Aristos

By May 11, 2014Archives, Opinion

Dalatdat o tonton na salita

S. Villafania

Nen Santiago Villafania

 

NAN-EMAIL ed siak so sakey a maistra tan tetepeten da no anto sa sentence ed salitan Pangasinan. Dia ed diksionario nen Mel Jovellanos, salita tan balikas kabaliksan odino talus ya imparungtal da. Dalatdat, panungtong, tan tonton na salita so inusar ko balet ed naduruman kipapasen. Lalo angankon akewkew so olu tan kanonotan nen madam ed ebat ko.

Anggapo so saksakey ya uusaren na sumusulat nipaakar ed panungtong (pangungusap ed salitan Tagalog/Filipino). Masurin nakaulan lan arapen da’ra’y linggwistiko tayo so pangipalapag na gramatikan Pangasinan. Bangta, sakbay tonia, lalon nakaukulan ya apigeren so impaway dan ortograpiya ya binalasubas na grupon anugiop ed saya.

*          *          *          *

Marakerakep so programa na Urdaneta City Library laut la ed pambabangat da ed saray wala ni’d kalangweran a manbasa. Say makapaermen labat ta dia kono mabetbet ed Filipino tan no maminsan ed salitan Ilocano.

Anggaman ontan, say masimoon kon pamirbir tan pangilugay ed saray manangitatanggoyor na Urdaneta City Library. Aligen tan manggawa met komun na dili ran programa so arum a library ed Pangasinan laut la ed Provincial Library.

Anto so kuan yo ditan ed Dagupan City Library, Mangaldan, tan Sta. Barbara?

*          *          *          *

Pantotongtongan mi na kaarok ya umaanlong a si Ping Li so posibilidad a nagawa so World Festival of Poetry, Philippines Poetic Sanctuaries 2015 dia ed Pangasinan. Iparungtal ko met ed saray kakaaron umanlong tan sumusulat ed bansa tan biek-taew ta no bilang natultuloy iya et baleg a kagalangan iya na luyag.

Pilalek kon ipaway so kuritan tayon Pangasinan ed apatiran sokung na mundo tan aliwa labat la ed laem na pinabli tin luyag.

Salaya tan aristos!

Back to Homepage

Share your Comments or Reactions

comments

Powered by Facebook Comments