Piaet ed Kuritan

Nen Santiago Villafania

 

 

BURAREG a tuldek so Pangasinan ed malayug a kuritan na Filipinas angga ni’d natan. Naemel so musia da’ra’y kuan ya umaanlong tan sumusulat, naepel so pluma ra, tan apa so pililikna ra ed rinasimiento na litiratura ed pinablin luyag.

the will of the river is to ‘undercome’

the obstacles that it cannot overcome

No onia labat komun so piaet, pilalek, tan pitamitam na umaanlong tan sumusulat ed luyag, agayla’y layug la anganko na kuritan ono litiraturan Pangasinan.

Masurin singa tayo orchid (tanaman ed dagem) ono balang a dika ed sinulmingan tin panaon.

Sikatayon umaanlong tan sumusulat natan et inggetar a nabiniagan na maralus ya apuy. Nepeg balet ya ondakel tan ombaleg so boleg tayo.

*          *          *          *

Kapigan labat, angipawit ak na sulat ed opisina na pinabli tin Gov. Amado T. Espino tan impasingayew ko’y ugagep kon magmaliw a kabiangan na Pangasinan Historical and Cultural Commission (PHCC) para ed language tan literary arts.

Anggaman aktibo tan onsusuporta ak ed saray pankulturan programa na gubernador laut la say paliagan a Kurit Panlunggaring tan Kurit Awiran, dakel ni so nakaukulan a gawaen nipakar ed salita tan litiraturan Pangasinan.

Wadtan a natitilak tayo ed panangipalapag na libro ed bernakular, anggapo’y riprisintanti na luyag ed saray literary organizations a singa dia ed National Commission for the Culture and the Arts, tan mabetbet anggapo’y ipapawit tayon umaanlong odino sumusulat ed saray tulagan ono conferences.

Pirawat kon makasabi tan nabasa nen Gov. Espino iman a sulat ko odino naparlasan da iyan artikulo. No anto man so kasumpalan to bilang, siansian magter ak manlingkor ed ngaran na salita tan kuritan tin Pangasinan.

*          *          *          *

Tan para ed saray kaluyagan iran aficionados, nia ira ay so babasaen a klasiko la ed litiraturan Pangasinan: Colegiala Dolores, Duksay Kapalaran, Samban Agnabenegan: sakey a kombilay nen Maria C. Magsano; Diad Lawak na bilay, tan Siak tan sika nen Juan C. Villamil.

Saray kontimporanion tongtong tan gawaran (fiction): Matuan panangaro nen Leonarda C. Carrera tan Gamal nen Linda Andaya-Grubb.

No wala ni’ra so narumog yo bilang a libro na anlong, salaysay, tongtong, kombilay (novel), tan arum nin insulat ed Pangasinan, email you pa labat ed siak dia’d illuminati.literatus@yahoo.com

Salaya tan aristos!

Back to Homepage

Share your Comments or Reactions

comments

Powered by Facebook Comments