Aristos

By July 15, 2013Archives, Opinion

O Filipinas!

S. Villafania

Nen Santiago Villafania

 

FILIPINAS o Pilipinas? Aya so tepet tan alingasngasan natan laut la dia ed facebook. Ginmapo nen imparungtal na Komisyon sa Wikang Filipino ya say nepeg a ngaran na pinabli tin bansa et Filipinas basi iya ed no anto so akasulat ed awaran tan no anto so inusar na saray ikikinon tin palbayani.

Sugiri na KWF ya sama’y litran P ed Pilipinas et ipawil la ed litran F total sayan litra et wala met la ed say balon ortograpiyan Filipino.

Saray ribolusionarion Pangasinan tan sumusulat ya anacbanua inusar da met so Filipinas bilang ngaran na lapag a bansa. Say Danggo Filipinas ed bersion a Pangasinan et ‘O Filipinas!’ so gapo to. Onia met so inusar na angiletneg na Gumil Filipinas.

Sirin, masurin say nepeg a ngaran na bansa et Filipinas aliwan Pilipinas! Republika na Filipinas!

*          *          *          * 


Tinepetan ak na kaaron umaanlong no autochthonous odino sipur la ya wala’y F tayo ed Pangasinan. Say ebat ko et anggapo, bangta, dia ed balon ortograpiya inyarum tayo met la ira’y arum a bayes a litra: c, f, j, q, v, x, z, tan arum ni’ra. Duamplo tan walon litra so uusaren tayo la ed Pangasinan.

Isusugiri met na KWF ya sama’y tanul a tatawagen dan schwa ed lingguistika say litran ‘e’ tayo (ontan met ed Mëranaw, Ilokano, tan arum nin salita ed Cordillera) et itdan na umlaut ono diaeresis. Balet ta aya so agko pikasakeyan ed sikara.

Anggaman masalimoot a pakdaar tan tongtongan iya nipaakar ed ortograpiyan Pangasinan lapu’d saray angiparungtal ed saya et agda impila ira’y fulanon nepeg a wala’y getar dan mangibesngaw na ngeswa ra ed linawa ran salita– saray sumusulat tan umaanlong na luyag, palagpasen ko la ta nakaukulan lan usaren so balon ortograpiya.

*          *          *          * 


Manaya, aya anganko so sankaunaan ya anlong a Pangasinan ed internet. Impalapag ko ed dilik a blog nen Hunio 28, 2001.

 

duga pa latan bai

natetelek ak lan mandedengel

ed sata’y ag napultot yon

Ama Mi tan Ave Maria

akatangay kayo la ed altar

no onsabi la’y ala sais

awit yo la ta’y rosarion

masile-sileng tan pimmuti la

ed kae-emben yo

nima’y niluto yo balet

inmangob tan atektek la

nima’y sira ed palanggana

agto ni naurasan nen atsi

mikokotoan diman ed biek ya abung

nima’y impesak anggapo ni’y angisirom

duga pa latan bai, duga la

naksel la so kamarerwa yo ed dasal

niya kami balet ay

amputi-puti la’y busaleg

manmulmulagat la ed eras

pialagar mi’y ibaga yo’y

diad ngara’y ama…

diad ngara’y anak…

tan ispirito santo…

mangan tila!

 

Salaya tan aristos!

Back to Homepage

Share your Comments or Reactions

comments

Powered by Facebook Comments