Aristos

By July 8, 2013Archives, Opinion

Limgas na Pangasinan

S. Villafania

Nen Santiago Villafania

 

MALIKET ak ta naimanok la’ra’y limgas na Pangasinan ed saray punsion tan pandaragup ed luyag. Nen imbebeneg a bulan matalakatak ak ed facebook ta singa ibibilar tayo ira labat ed paliagan na parakepa’y lupa tan laman. Ni anggapo’y alimeng kon mumukatan da nen Agew na Pangasinan.

Marakep no wala met so adbokasiya da’ra’y ‘limgas’ na Pangasinan pian ag ira labat lingay-lingayen ed ganggana ra. Anggapo anganko’y mauges no itangkap da’d dili ra no anto so peteg ya inkabii na sakey a Pangasinan ed imahin nen binari Urduja.

Anggaman ontan, say masimoon kon pangilugay ed sikayoran musia na balon kailalakan tan rilag na luyag!

*          *          *          *

Makapaibeg so nagagawan rinasimiento ono renaissance na salita tan litiratura na Bicol. Singa say dili tayon gubernador, say gubernador da et wala met so pililikna tan puso to ed arti tan kultura na pinabli ran luyag. Angiletneg ira na opisinan pankultura ya yoolu na sakey a poet laureate tan suportado da’ra’y umaanlong tan sumusulat. Wala met komun so onia ed Pangasinan, awa Gov. Espino?

Makapaboblay na laman tan kanonotan a nanaimatonan kon dia’d dili tayon luyag et mabilabilay ira’y sumusulat no panaon labat na paliagan.

Makapoy met amo so kipapasen na creative writing ed saray awiran tan unibersidad tayo. Panon to kasi so pampaparaan da nipaakar ed saya’y K-12 a kuan no iner akabatan kon dia ed grado 11 et wala so aaralen dan say pakdaar nipaakar ed litiratura na rihiyon?

Insan ibebelyaw na sakey a mankuankuanan a sumusulat a wala so kanon na kuritan odino litiratura tayo ed Pangasinan. Iner kasi so kawalaan to itan so ibabagam, kaluyagan Sianong?!

*          *          *          *

Kapawapaway labat na balon librok a koliksion na anlong a ghazal tan wala’y titulon Ghazalia: Maralus ya Ayat (http://www.amazon.com/Ghazalia-Maralus-Santiago-B-Villafania/dp/1490470506/) ed sayan bulan. Itepel yo pa balet ta nasaliw labat iya ed Amazon.com no iner wadman a ilalakok so duara nin librok a Bonsaic Verses tan Malagilion: Sonnets tan Villanelles.

Pirawat kon sarayan libron ipapalapag ko et pakapangiter na inspirasion ed saray balon sumusulat tan umaanlong tan no nayari et mangipalapag met ira pian onyaman tan onyabong met so kuritan ono litiratura tayo.

Baleg so pananisiak ya say indie publishing so arapen ono future na publikasion na litiraturan Pangasinan. Sikato la iya so gagawaen dan alternatibon panangipalapag na libro dia ed America tan Europa natan.

Salaya tan aristos!

Back to Homepage

Share your Comments or Reactions

comments

Powered by Facebook Comments