Aristos

Balitok a siglo

Nen Santiago Villafania

NIBAGAK ya ed sayan kailalakan sinmulming so balitok a siglo na anlong tan umaanlong a Pangasinan. Kabiangan ed sarayan umaanlong et sikara di Melchor Orpilla, Atty. Ferdinand Quintos, Sergio Bumadilla, Jesamyne Diokno, tan Hermie Beltran. Wala met la’ra’y manumtumbok a wala’d kalangweran laut la’d sarama’y dinmalan ed sankaunaan ya Kurit Awiran tan Kurit Panlunggaring.

Nakaululan nin aruman so alenleneg a paliagan na anlong tan suportaan komun na unibersidad tan kolihiyo ed pinabli tin luyag ira’y sumusulat tayo ed dilin salita dia ed panamegley na pangiletneg na “university-based creative writing workshops” ono awiran. Gagawaen da la iya ed Bicol, Cebu, Leyte, Iligan City, tan Mindanao.

Ontulong ak no bilang wala anggan sakey so mangupkop ed sikamin nauli lan umaanlong tan sumusulat ed saray universidad tayo.

Wala komun so makabasa ed University of Pangasinan, Virgen Milagrosa University, PSU, Lyceum Northwestern University, Perpetual Help College, Colegio de Dagupan, Colegio San Jose de Alaminos, Divine World College, Luna Colleges, Agno Valley College, Our Lady of Manaoag College, Pangasinan Merchant Marine Academy, San Carlos College, awa?

* * * *

Moderator ak ed panel na Luzon Natural Assets: How Geography Shapes Genres ed agawan 3rd Philippine International Literary Festival nen Nobiembri 14-16, 2012 dia ed Ayala Museum. Kaiba ed panel ira’y ikikinon iran sumusulat tan umaanlong: Abdon Balde (Bicol), Hermie Beltran (Pangasinan), tan Kristian Cordero (Bicol). Imparungtal darayan sumusulat no panon naapiktuan tan atibokel na hiyograpiya’y dili ran rihiyon so kuritan da.

Pilalek kon dia’d ontumbok iran panaon et tatoor tan wala met so naiparungtal na Pangasinan para ed kanon na kuritan ed lapag a bansa.

* * * *

Iimbitaan ko met ira’y sumusulat tayo ed Philippine PEN Annual Conference ya nagawa ed Cultural Center of the Philippines (CCP) no Disiembri 6-7, 2012. Say tima o pakdaar ed sayan taon et “The Writer as Public Intellectual”. I-moderate ko so panel na “Writer and Social Media” no kumaduan agew na tulagan.

* * * *

Ipalapag met la ed sayan taon so translation na librok a Murtami ya impatalus nen Vijaya Kandpal ed salitan Hindi tan initdan to iya na titulon Premanjali.

Singa met no ama’y sikat ya libron Getanjali nen Rabindranath Tagore, awa?

Magnayon so kuritan a Pangasinan!

Salaya tan aristos!

Back to Homepage