Aristos
Impambaroy ed Luyag na Panay
Nen Santiago Villafania
MABETBET no onkaili ak ed sakey e lugar ono pasen, saray sumusulat tan umaanlong so uunaen kon pakabatan. Tan dia’d impanwaywayak ya agano ed Iloilo tan Capiz dia’d luyag na Panay nen imbeneg a bulan na Agosto akapituyawan ko ira di Luis Batchoy, 2-time palanca winner; Ma. Lucille Manuel, sakey met ya umaanlong, pintor, tan galgalangen ya interior designer ed Capiz; tan say humahaiku tan primiadon umaanlong ed salitan Akeanon a si Melchor Cichon.
Sakbay tonia ed akaiba mi nen Ms. Manuel si Sir Mel ed pandem tan inyawat da ed siak so pigaran libro da.
Anggaman anggapo’y malaem ya oras pian manbayag ak diman, akabatan so kipapasen na salita tan kuritan ed Panay laut la ed lugar na Iloilo, Capiz, tan Aklan.
Makatalus ak na daiset a salitan ilonggo kanian anggan pikewet so panagsalitak et akidalatdatan ako met. Ay ag nayarin natilak so maasnan dila no kuritan so pantutungtongan!
Ompawil ak ed Capiz ed saya’y arapen a Nobiembri para ed sakey ya anlongan no bilang natultuloy iya.
* * * *
Apili so duaran anlong kon ‘In Our Own Age of Renaissance’ tan ‘To Lucille’ para ed antolohiyan ANI 37: Cleansing and Renewal issue ya iparlas ed saya’y arapen a Nobiembri 2012. Maliket ak ta pigara ed saray fellows ed 3rd Cordillera Creative Writing Workshop et kaibak la ed sayan antolohiya.
Pirawat tan pilalek kon dia’d arapen iran taon et nabasa ti met la so ngaran, anlong tan salaysay da’ra’y fellows ed sankaunaan a Kurit Awiran.
Parngel ko iya ed saray kabiangan na inletneg a grupon Kapituyaw! Pabalulaslasen tayo so boleg na sumusulat tan umaanlong ed lapag a bansa!
Ipapaneknek ko lamet ya say bilay na sakey a salita et wala’d mabunan litiratura.
Salaya tan aristos!
Share your Comments or Reactions
Powered by Facebook Comments
